متفرقات >> حلال و حرام
سوال نمبر: 604294
کیا ضرورت کے وقت کسی ایسے شخص سے قرض پیسے مانگے جا سکتے ہیں جن کی کمائی حرام ہو مثلاً میرے اوپر کسی کا قرض ہو اور وہ قرض مانگ رہا ہو لیکن ابھی میں اس قابل نہیں کہ قرض ادا کر سکوں تو ایسی صورت میں اگر کسی حرام کمائی والے سے قرض مانگ لیا تو کیا یہ شرعی اعتبار سے جائز ہوگا؟ یاد رہے کہ یہ سوال اس صورت کے حوالے سے پوچھا گیا جب کوئی حلال کمائی والا قرض نہیں دے سکتا ہو۔
جواب نمبر: 604294
بسم الله الرحمن الرحيم
Fatwa : 749-608/D=09/1442
جس شخص کی کل آمدنی یا اکثر آمدنی حرام ذریعہ سے ہے یقین یا ظن غالب کے درجہ میں یہ بات معلوم ہو تو اس سے ہدیہ قبول کرنا جائز نہیں۔ قرض لینا بھی ایک طرح کا تبرع ہے لہٰذا اس سے بھی احتیاط کرے۔ ہاں اگر دینے والا یہ بتلادے کہ یہ رقم خاص حلال ذریعہ سے حاصل ہوئی ہے تو اس کا لینا جائز ہے۔
قال فی الہندیة: آکل الربوا وکاسب الحرام اہدیٰ الیہ او اضافہ وغالب مالہ حرام لایقبل، ولا یاکل ما لم یخبرہ ان ذالک المال اصلہ حلال ورثہ او استقرضہ الح (ج: 5، ص: 343، فتاوی ہندیة)
واللہ تعالیٰ اعلم
دارالافتاء،
دارالعلوم دیوبند