عنوان: بے اولاد شخص نے لے پالک بیٹا لیا تو اس كی جائیداد کس طرح تقسیم ہوگی؟

سوال: سوال: سوال نمبر ۱۔ جس نے زمین اور جائیداد لے پالک کو دیاوصیت کے مطابق یا اپنے زندگی میں تو اس شخص نے قرآن اور حدیث کے رو سے کیسا کام کیا۔ سوال نمبر۲۔ ایک بے اولاد شخص جو نومبر ۲۰۱۳ میں وفات ہوگیا تھا کہ ۲ سگے بھائی تھے ۲ سوتیلے بھائی تھے ۔ اس کا سگا بڑا بھائی ۲۰۰۳ میں وفات پاگیا تھا۔ اس کے ایک بہن اور ایک بیوی بھی زندہ ہیں۔ بے اولاد شخص کا ترکہ چار سال سے تقسیم نہیں ہوا اور فروری ۲۰۱۷ میں اس کا دوسرا سگا بھائی بھی فوت ہوگیا۔ بے اولاد شخص نے لے پالک بیٹا لیا اپنے سوتیلے بھائی سے ۔ تو اس کا جائیداد شرع وسنت کی رو سے کس طرح تقسیم ہوگا۔ سوال نمبر۳۔ ایک بے اولاد شخص نے لے پالک بیٹا پالاتھا۔ بے اولاد شخص نومبر ۲۰۱۳ میں وفات پاگیا۔ اس کے ۲ سگے بھائی تھے ۲ سوتیلے بھائی تھے ۔ اس کا سگا بڑا بھائی ۲۰۰۳ میں وفات پاگیا تھا۔ اس کے ایک بہن اور ایک بیوی بھی زندہ ہیں۔ لے پالک کا اپنا حقیقی باپ بھی زندہ ہے نے ابھی تک حقیقی وارثین کونہ جائداد دیا اور نہ ہی وصیت نامہ دیکھایا۔ اور نہ بے اولاد شخص نے تحریراًاور حلفیاً وارثین کو بتایا۔ لے پالک اور اس کا حقیقی باپ جو بے اولاد شخص کا سوتیلا بھائی بھی ہے پورے جائداد کا وارث بننا چاہتا ہے ۔ تو شریعت اس بارے میں کیا کہتی ہے ؟

جواب نمبر: 15021301-Sep-2020 : تاریخ اشاعت

بسم الله الرحمن الرحيم

Fatwa: 683-728/N=7/1438

(۱):وصیت صرف تہائی میں نافذ ہوتی ہے، اس سے زیادہ میں نہیں اگرچہ مرحوم نے کسی کے لیے تہائی سے زیادہ کی وصیت کی ہو؛ البتہ سب وارثین منظور کرلیں تو کچھ حرج نہیں، بہ شرطیکہ سب عاقل وبالغ ہوں؛ اس لیے اگر کسی نے اپنی ساری زمین وجائداد کی اپنے لے پالک کے لیے وصیت کی تو وہ صرف تہائی میں نافذ ہوگی، اور تہائی سے زائد میں وارثین کی اجازت کے بغیر نافذ نہ ہوگی۔ اور اگر کسی نے لے پالک کو اپنی زندگی میں اپنی ساری زمین وجائداد دیدی تو یہ ہبہ ہے اور اس میں ہبہ کی تمام شرائط کا پایا جانا ضروری ہے، اس کے بغیر ہبہ تام ومکمل نہ ہوگا ۔ اور ہبہ تام ومکمل ہونے کی صورت میں لے پالک ہبہ کردہ زمین وجائداد کا مالک تو ہوجائے گا؛ لیکن مرحوم نے اگر یہ تصرف اپنے وارثین کو نقصان پہنچانے کے لیے کیا یا اس کے عمل سے ظاہر یہی ہے تو وہ گنہگار ہوگا؛ کیوں کہ حدیث میں اس سے منع کیا گیا ہے ؛ بلکہ ایسی حرکت پر جنت سے محروم کردیے جانے کی وعید آئی ہے۔

عن أنس رضی اللہ عنہ قال: قال رسول اللہ صلی اللہ علیہ وسلم: من قطع میراث وارثہ قطع اللہ میراثہ من الجنة یوم القیامة رواہ ابن ماجہ، ورواہ البیہقي في شعب الإیمان عن أبي ہریرة رضي اللہ عنہ (مشکاة المصابیح، ص۲۶۶، ط: المکتبة الأشرفیة دیوبند)، قولہ: ”من بعد وصیة یوصی بہا أو دین غیر مضار“ أي لتکون وصیتہ علی العدل، لا علی الإضرار والجور والحیف بأن یحرم بعض الورثة أو ینقصہ أو یزیدہ علی ما قدر اللہ لہ من الفریضة فمتی سعی في ذلک کان کمن ضادّ اللہ في حکمہ وقسمتہ، ولہذا قال ابن أبي حاتم حدثنا أبي، حدثنا أبو النضر الدمشقي الفرادیسی، حدثنا عم ربن المغیرة عن داوٴد بن أبي ہند عن عکرمة عن ابن عباس عن النبي صلی اللہ علیہ وسلم قال: الإضرار في الوصیة من الکبائر، ․․․ قال ابن جریر: والصحیح الموقوف (تفسیر ابن کثیر ۲:۲۳۱، ۲۳۲)، ولأنا لو جوزنا الوصیة للورثة لکان للموصي أن یوٴثر بعض الورثة، وفیہ إیذاء البعض وإیحاشہم فیوٴدي إلی قطع الرحم وأنہ حرام وما أفضی إلی الحرام فہوحرام دفعا للتناقض(بدائع الصنائع، ۶: ۴۳۳،ط: مکتبہ زکریا دیوبند)، وشرائط صحتھا فی الموھوب أن یکون مقبوضاً غیر مشاع الخ (الدر المختار مع رد المحتار، کتاب الھبة، ۸: ۴۸۹، ط: مکتبة زکریا دیوبند)، وکما یکون للواھب الرجوع فیھا - أي: فی الھبة الفاسدة - یکون لوارثہ بعد موتہ؛ لکونھا مستحقة الرد (رد المحتار ۸: ۴۹۶)۔ نیز مجمع الانہر (۴: ۴۱۹مطبوعہ: دار الکتب العلمیہ بیروت) دیکھیں۔

(۲): صورت مسئولہ میں لا ولد بھائی کا سارا ترکہ بعد ادائے حقوق متقدمہ علی الارث ۴/ حصوں میں تقسیم ہوگا، جن میں سے بیوہ اور بہن کو ایک، ایک حصہ اور باحیات بھائی کو ۲/ حصے ملیں گے۔ اور اب چوں کہ فروری ۲۰۱۷ء میں باحیات بھائی کا بھی انتقال ہوگیا ہے؛ لہٰذا اس کا ترکہ اس کے وارثین کو دیا جائے گا اور وہ حسب شرع آپس میں تقسیم کرلیں گے۔ اور صورت مسئولہ میں سوتیلے (باپ شریک)بھائی بہنوں کو کچھ نہیں ملے گا؛ کیوں کہ حقیقی بھائی کی موجودگی میں باپ شریک بھائی بہن وارث نہیں ہوتے ہیں۔

(۳): اگر وارثین وصیت تسلیم نہ کرتے ہیں، یعنی: انھیں لے پالک کے دعوی وصیت پر اطمینان نہ ہو تو محض دعوی سے وصیت کا ثبوت نہ ہوگا ؛ بلکہ ثبوت شرعی پیش کرنا ضروری ہوگا اور وصیت کی صورت میں لے پالک صرف تہائی کا حق دار ہوسکتا ہے، اس سے زیادہ کا نہیں؛ لہٰذا وصیت ثابت ہونے کی صورت میں بھی اس کا مرحوم کی تمام زمین وجائداد پر قابض ہوجانا اور وارثین کو ان کا شرعی حق وحصہ نہ دینا ناجائز وحرام ہے، ایسے شخص کی آخرت میں سخت پکڑ ہوسکتی ہے، اللہ تعالی حفاظت فرمائیں۔