عنوان: حمل ضائع كردینے سے كیا عدت پوری ہوجائے گی؟

سوال: میرے شوہر نے جب مجھے طلاق دی تب میں حمل سے تھی، پہلا مہنہ تھا حمل کا، طلاق کے بعد گھر والوں کے پریشر میں آکے میں نے بچہ ضائع کردیا ، اب سب کا کہنا ہے کہ میری عدت بھی پوری ہوگئی ہے بچہ ضائع ہونے کے ساتھ، تو کیا میری عدت ختم ہوگئی ہے؟

جواب نمبر: 17364701-Sep-2020 : تاریخ اشاعت

بسم الله الرحمن الرحيم

Fatwa : 119-94/M=02/1441

وضع حمل کے ذریعہ عدت پوری ہونے کے لئے لازم ہے کہ بچہ کی خلقت واضح ہوگئی ہو یا کوئی عضو مثلاً ہاتھ، پیر وغیرہ بن گیا ہو یا حمل میں جان پڑ گئی ہو، حمل کے پہلے مہینے میں یہ سب کچھ نہیں ہوتا لہٰذا صورت مسئولہ میں اسقاط حمل کی وجہ سے عدت پوری نہیں ہوئی بلکہ تین حیض کے ذریعہ عدت پوری ہوگی، حمل ضائع کرنے کے بعد اگر کم سے کم تین دن تک خون آیا تو وہ ایک حیض شمار ہوگا اور اس کے بعد دوحیض اور گذارنے ہوں گے تب عدت ختم ہوگی، اور بغیر سخت مجبوری کے اگر حمل ضائع کیا گیا تو اس گناہ سے توبہ لازم ہے اور گھر والوں نے ناحق پریشر ڈالا ہے تو وہ بھی گنہ گار ہوئے۔ وإذا أسقطت سقطاً استبان بعض خلقہ انقضت بہ العدة لأنہ ولد وإن لم یستبن بعض خلقہ لم تنقض الخ (البحر الرائق: ۴/۲۲۹، زکریا)

-----------------------------

جو حکم لکھا گیا ہے وہ درست ہے۔ (س)