عنوان: ناجائز تعلقات ركھنے والی عورت كو طلاق دینا؟

سوال: میری شادی ۱۵/۷/۲۰۱۱ء کو ہوئی تھی، میری اب دو لڑکیاں ہیں ایک ڈھائی سال کی اور دوسری ایک سال کی، میری عورت کے کسی کے ساتھ ناجائز تعلقات ہیں مجھے اب پتا چلا ہے، اب میں طلاق دینا چاہتا ہوں مگر مجھے ڈر لگ رہا ہے کہ کہیں وہ لوگ کیس نہ کردیں، میرے گھر کی مالی حالت بہت خراب ہے ، اگر وہ عورت میرے گھر میں رہی تو میری پوری نسل ہی خراب ہو جائے گی، میری اس سے کبھی نہیں بنی۔ برائے مہربانی کوئی حل بتائیں، میں کیا کروں؟

جواب نمبر: 14759931-Aug-2020 : تاریخ اشاعت

بسم الله الرحمن الرحيم

Fatwa ID: 369-382/Sn=5/1438

صورت مسئولہ میں اگر آپ طلاق دینا چاہتے ہیں تو طلاق دے سکتے ہیں، شرعاً آپ پر کوئی گناہ نہ ہوگا؛ لیکن آپ کا اندیشہ بھی بہ جا ہے، اس خطرے سے بچنے کے لیے یا تو آپ بیوی یا اس کے گھر والوں کے ساتھ بات چیت کے ساتھ طلاق دیں اور ان سے تحریر بھی لیں کہ وہ اس پر راضی ہیں اور کوئی عدالتی کارروائی نہیں کریں گے، اگر یہ نہ ہوسکے تو کسی اچھے وکیل سے مشورہ کریں اور ان کے بتائے ہوئے طریقے کے مطابق ہی طلاق دیں؛ البتہ یہ بات ملحوظ رہے کہ ابتداءً صرف ایک طلاق دی جائے، تین طلاق ہرگز نہ دی جائے، ایک ساتھ تین طلاق دینا ناجائز اور گناہ ہے۔