عنوان: افطار اور سحری کی دعائیں

سوال: افطار کے وقت اللھم لک صمت وبک اٰمنت وعلی رزقک افطر اور سحری کے وقت بصوم غدٍ نویت من شھر رمضان پڑھتے ہیں کیا ان الفاظ کے ساتھ صحاح ستہ میں سے کسی کتاب میں درج ہے اگر ہے تو براہ کرم کتاب کا نام اور صفحہ نمبر ضرور بتائیں اللہ جزائ خیر دے اور اآپ کی عمر کو دراز کرے اٰمین

جواب نمبر: 5600801-Sep-2020 : تاریخ اشاعت

بسم الله الرحمن الرحيم

Fatwa ID: 1518-1513/N=1/1436-U87 افطارکے وقت جو دعا مسنون ہے اس کے الفاظ یہ ہیں: ”اللَّھُمَّ لَکَ صُمْتُ، وَعَلَی رِزْقِکَ أَفْطَرْت“ کذا في مشکاة المصابیح (ص۱۷۵) عن أبی داوٴد مرسلاً وقال الألباني في التعلیق علی المشکاة: ”رواہ أبو داوٴد مرسلاً“ ولکن لہ شواہد یقوي بہا․ اور اس دعا میں ”وبک آمنت وعلیک توکلتُ“ کا اضافہ جامع الرموز میں قہستانی نے ذکر کیا ہے۔ (کتاب الصوم قبل فصل الاعتکاف: ص۱۶۴)، لیکن حدیث کی کتابوں میں مجھے اس کا کوئی حوالہ نہیں ملا؛ بلکہ ملا علی قاری رحمہ اللہ نے مرقات المفاتیح (۴:۴۲۶، مطبوعہ دار الکتب العلمیہ بیروت) میں اورحضرت مولانا عاشق الٰہی بلند شہری رحمہ اللہ نے حصن حصین مترجم (ص۲۱۶) کے حاشیہ میں اس اضافہ کو بے اصل قرار دیا ہے اور حضرت مفتی محمد شفیع صاحب نور اللہ مرقدہ نے جواہر الفقہ (۳:۵۲۲ مطبوعہ مکتبہ زکریا دیوبند) میں صرف مسنون الفاظ ذکر فرمائے ہیں اور ”بصوم غدٍ نویت من شہر رمضان“ سحری کی دعا نہیں ہے؛ بلکہ یہ عربی میں نیت کے الفاظ ہیں اور آدمی حسب سہولت اردو یا عربی جس میں چاہے نیت کرسکتا ہے؛ بلکہ نیت دل کے ارادہ کا نام ہے، زبان سے نیت کے الفاظ کہنا ضروری نہیں، اور اگر کوئی دلجمعی وپختگی کے لیے کہہ لے تو ناجائز بھی نہیں۔