عنوان: مسجد حرام کے اندر خواتین بھی مردوں کے شانہ بشانہ کھڑی ہوجاتی ہیں ہم ایسے میں كیا كریں؟

سوال: میں نے عام طورپر مشاہدہ کیا ہے کہ مسجد حرام کے اندر خواتین بھی مردوں کے شانہ بشانہ کھڑی ہوکر نماز پڑھتی ہیں اور کہتی ہیں کہ وہ اپنے محرموں کے پیچھے کھڑی ہوتی ہیں۔مغرب کی نماز میں اسے ٹی وی اسکرین پر دیکھا جاسکتاہے۔ براہ کرم، اس بارے میں رہنمائی فرمائیں۔

جواب نمبر: 6761801-Sep-2020 : تاریخ اشاعت

بسم الله الرحمن الرحيم

Fatwa ID: 1014-1122/SN=12/1437

آپ کی بات صحیح ہے کہ مسجدِ حرام میں خواتین بعض مرتبہ مردوں کے بغل میں کھڑی ہو جاتی ہیں، خواتین کایہ طریقہ صحیح نہیں ہے، اس سے مردوں کی نماز خطرے میں پڑ جاتی ہے؛ اس لیے خواتین کو چاہئے کہ مردوں سے ہٹ کر کھڑی ہوں، نیز مردوں کو بھی چاہئے کہ نیت باندھتے وقت دائیں بائیں اور سامنے دیکھ لیں کہ کوئی عورت تو نہیں ہے، اس کے بعد نیت باندھیں، نیت باندھنے کے بعد اگر کوئی عورت آکر بغل میں کھڑی ہونے لگے تو دوران نماز اسے اشارے سے روکنے کی کوشش کریں، اگر اشارہ کے باوجود وہ عورت نہ رکے اور نیت باندھ لے تو ایسی صورت میں مرد کی نماز فاسد نہ ہوگی؛ بلکہ عورت کی نماز ہی فاسد قرار پائے گی؛ اس لیے کہ اشارہ کر دینے کی وجہ سے مرد اپنی ذمہ داری سے فارغ ہوچکا ہے ․․․․ فلو حاذت المقتدی بعد الشروع وأشار إلیہا بالتأخر ولم تتأخر فسدت صلاتہا دونہ وینبغي أن یعدّ ہذا فی الشروط بأن یقال: ولم یشر إلیہا بالتأخر إذا حضرت بعد شروعہ (ردالمختار علی الدر المختار، ۲/۳۲۰، باب الإمامة، ط:زکریا، دیوبند)