عبادات >> صلاة (نماز)
سوال نمبر: 604932
پیشاب کے قطرات آنے کی وجہ سے ظہر اور عصر کی نماز ایک ساتھ پڑھنا
مجھے پیشاب کے بعد کافی دیر تک قطروں کے رکنے کا انتظار کرنا پڑتا ہے اس لئے میں اپنے کام کاج کے دوران نماز ظہر ادا نہیں کر سکتا کیونکہ بہت سے اور لوگ بھی ہوتے ہیں جنہوں نے واش روم استعمال کرنا ہوتا ہے اور اتنی دیر انتظار کرواتے ہوئے اچھا نہیں لگتا۔ مجھے پتہ چلا ہے کہ گھر واپس آکر ظہر اور عصر جمع کر کے ادا کر سکتا ہوں۔ کیا رائے ہے آپ کی قرآن و سنت کی روشنی میں؟
جواب نمبر: 604932
بسم الله الرحمن الرحيم
Fatwa:820-556/sn=11/1442
صورت مسئولہ میں آپ کے لئے ظہر کی نماز کو اس کے وقت سے مؤخر کرکے عصر کے وقت دونوں نمازوں کو ایک ساتھ پڑھنا شرعا جائز نہیں ہے، کسی نماز کو دوسری نماز کے وقت ادا کرنا خواہ جمعِ تقدیم کے طور پر ہویا جمع ِتا خیر کے طور پر، شرعا جائز نہیں ہے؛ لہذا آپ اس پریشانی سے بچنے کے لئے کوئی دوسرا حل تلاش کریں،بہتر ہے کہ آپ پیشاب کرنے کا معمول نماز کے وقت نہیں ؛ بلکہ اس سے کچھ پہلے یا بعد میں بنائیں جب لوگوں کی بھیڑ نہ ہو یا کم ہو، اور اُس وقت اچھی طرح استبرا کرکے قطرات نکال دیں ، نماز کے وقت صرف وضو کرکے نماز ادا کرلیں، ایسا کرنے سے لوگوں کو انتظار کی زحمت بھی نہ ہوگی نیز آپ کی نماز بھی وقت پر ہوجائے گی ۔
واللہ تعالیٰ اعلم
دارالافتاء،
دارالعلوم دیوبند