عنوان: سجدے کی حالت میں مقتدیوں کا امام سے آگے چلا جانا

سوال: کیا فرماتے ہیں علماء دیں اس مسئلے میں کہ جگہ کی قلت کی وجہ سے مقتدی حضرات امام صاحب کے تھوڑا پیچھے کھڑے ہوئے اور نماز میں سجدے کے دوران امام صاحب کے سینے تک چلے گئے تو کیا ایسی صورت میں نماز ہوجائے گی؟

جواب نمبر: 16113701-Sep-2020 : تاریخ اشاعت

بسم الله الرحمن الرحيم

Fatwa:1096-944/L=8/1439

نماز میں امام سے آگے بڑھ جانا مفسدِ صلاة ہے اور آگے بڑھ جانے کا مطلب یہ ہے کہ مقتدی کی ایڑی امام کی ایڑی سے آگے بڑھ جائے ،اگر مقتدی کی ایڑی امام کی ایڑی سے آگے نہیں بڑھتی ہے تو اگر چہ سجدے میں مقتدی کا سر امام کے سینے کے برابر چلا جائے بلکہ اس سے بھی آگے چلا جائے تو نماز فاسد نہ ہوگی۔ویقف الواحد ․․أي ․محاذیامساویاً لیمین امامہ علی المذہب ،ولا عبرة بالرأس بل بالقدم(درمختار) فلو حاذاہ بالقدم ووقع سجودہ مقدماً علیہ لکون المقتدي أطول من امامہ لا یضر،ومعنی المحاذاةبالقدم :المحاذاة بعقبہ․(شامی:۲/۳۰۷،۳۰۸ط:زکریا دیوبند) واضح رہے کہ اگر مقتدی ایک سے زائد ہوں تو بلا ضرورت ان کا امام کے قریب کھڑاہونا مکروہ ہوگا ،ایسی صورت میں ان کو چاہیے کہ امام کے پیچھے کھڑے ہوں۔