عنوان: جہاز یا کسی اور جگہ جہاں کسی وجہ سے کھڑے ہوکر نماز نہ پڑھی جاسکے تو کیا بیٹھ کر پڑھی جاسکتی ہے؟

سوال: میرا سوال یہ ہے کہ فرض کریں کہ میں جہاز یا بس سے سفر کررہاہوں جس کے دوران اترنے تک نہ تو میں نمازکو موٴخر کرسکتاہوں (کیوں کہ نماز کا وقت ختم ہوجائے گا)اورنہ میں کھڑے ہو کر اور قبلہ رخ ہو کر نماز پڑھ سکتاہوں جگہ کی تنگی یا کچھ پابندیوں کی وجہ سے (کھانا کھانے یا شور شرابے وغیرہ سے بچنے کے لیے ) ، تو ایسی صورت حال میں کیا (۱) میں بیٹھ کر نماز پڑھ سکتاہوں؟(۲) اگر بیٹھ کر نماز پڑھنے کی اجازت نہیں ہے تو کیا میں نماز کو موٴخر کر کرسکتاہوں اور اس کے ساتھ دوسری نماز پڑھ سکتاہوں؟(جب کہ حنفی فقہ میں اس کی اجازت نہیں ہے)۔ براہ کرم،اس بارے میں پوری رہنمائی فرمائیں۔

جواب نمبر: 14850601-Sep-2020 : تاریخ اشاعت

بسم الله الرحمن الرحيم

Fatwa ID: 346-371/N=6/1438

(۱): اگر بس کے سفر میں بہت زیادہ بھیڑ وغیرہ ہونے کی وجہ سے کھڑے ہوکر نماز پڑھنے کی کوئی صورت نہ ہو اور نماز کا وقت تنگ ہورہا ہو کہ جب تک بس کسی بس اڈے وغیرہ پر پہنچے گی، نماز کا وقت نکل جائے گا تو ایسی صورت میں شرعاً بیٹھ کر فرض نماز پڑھنا جائز نہ ہوگا؛ بلکہ آدمی نماز کو موٴخر کردے اور کسی بس اڈے وغیرہ پربس سے اترکر کھڑے ہوکر نماز پڑھے۔ اسی طرح اگر ہوائی جہاز میں اترنے کا وقت قریب ہونے کی وجہ سے جہاز کے عملہ کی طرف سے سیٹ اٹھنے اور کھڑے ہونے کی اجازت نہ ہو اور نماز کا وقت تنگ ہورہا ہو تو قیام پر قدرت کے باوجود سیٹ پر فرض نماز پڑھنے کی اجازت نہ ہوگی؛ بلکہ ایسا شخص نماز موٴخر کردے اور جہاز سے اترنے کے بعد کھڑے ہوکر فرض نماز پڑھے۔ وکذا لا اجتمعوا في مکان ضیق لیس فیہ إلا موضع یسع أن یصلي قائماً فقط یصبر ویصلي قائماً بعد الوقت کعاجز عن القیام والوضوء فی الوقت ویغلب علی ظنہ القدرة بعدہ……بحر ملخصاً عن التوشیح( رد المحتار، کتاب الطھارة، باب التیمم، ۱:۳۹۶،ط: مکتبة زکریا دیوبند)۔ وفي البحر: ولیس ہناک موضع أن یصلي قائمًا فقط الخ (۱:۲۴۴، ط: دار الکتب العلمیة، بیروت)

(۲): احناف کے نزدیک ایک وقت میں پیشگی طور پر دو نمازیں پڑھنا درست نہیں؛ کیوں کہ وقت آنے پر نماز فرض ہوتی ہے، اس سے پہلے نہیں۔ اسی طرح جان بوجھ کر بلا عذر شرعی کوئی نماز قضا کرنا بھی جائز نہیں؛ البتہ اگر عذر شرعی کی وجہ سے نماز قضا ہوجائے، جس کے نتیجے میں آئندہ وقت میں دو نمازیں ایک ساتھ ادا کرنی ہو؛ ایک چھوٹی ہوئی، دوسری: اس وقت کی فرض نماز تو اس صورت میں عذر شرعی کی وجہ سے کوئی گناہ نہ ہوگا؛ البتہ آدمی کو حتی الامکان یہ چاہیے کہ سفر کا ایسا نظام بنائے کہ کوئی نماز قضا نہ ہو۔