عنوان: قرآن شریف، نوافل، ذکر درودِ پاک پڑھ کر ثواب کا پہنچانا حدیث شریف سے ثابت ہے،

سوال: میں سعودی عربیہ میں ہوں، میرے والد صاحب کا پانچ مہینے پہلے انتقال ہو گیا تھا ، اللہ کے کرم سے مجھے ہندوستان جانے کا موقع ملا، اور میرے رشتہ دار بھائی مفتی صاحب ہیں ، انہوں نے مسجد کے امام صاحب سے نماز پڑھانے کی اجازت لے لی تھی اور مجھے نماز جنازہ پڑھانے کا موقع ملا، جنازہ پڑھاتے وقت صرف پہلی تکبیر میں ہاتھ اٹھا کر اللہ ا کبر کہا ، پھر بعد کے تین تکبیر بغیر ہاتھ اٹھائے اللہ اکبر کہا ،کیا یہ صحیح ہے؟اگر نہیں تو اللہ معاف کرے ، اس کا کفارہ بتائیں۔اور ابھی میں سعودی میں ہوں ، میں یہاں سے ان کے لیے ایصال ثواب کے لیے پڑھ کر بخشتاہوں۔ (۱) کیا قرآن شریف اور نوافل نماز اور ذکر و درود پڑھ کر ایصال ثواب کے طورپر بخشا جاسکتاہے؟کیا حدیث سے ثابت ہے؟ (۲) جب میرے بھائی والد صاحب کی زیارت کے لیے جاتے ہیں تو میں ان ک کہتاہوں کہ والد صاحب کو میراسلام کہنا ہے؟ (۳) ویسے تو قبرستان میں سارے مرحومین کو سلام کرتے ہیں مگر صاحب قبر کا نام لے کر سلام کرنا کیسا ہے؟ (۴) والد صاحب کی کچھ فرض نماز باقی ہیں، کیا میں ان کی عمری قضا پڑھ سکتاہوں؟

جواب نمبر: 6170101-Sep-2020 : تاریخ اشاعت

بسم الله الرحمن الرحيم

Fatwa ID: 1237-1250/H=12/1436-U (۱) قرآن شریف، نوافل، ذکر درودِ پاک پڑھ کر ثواب کا پہنچانا حدیث شریف سے ثابت ہے، فتح القدیر میں باب الحج عن الغیر کے تحت دلائل مذکور ہیں۔ (۲) قبرستان میں پہنچ کر قبرستان میں مدفون تمام مردوں کو اجتماعی خطاب کے ساتھ سلام کرنا تو حدیث شریف سے ثابت ہے، جیسا کہ آپ کو معلوم ہی ہے کسی مخصوص میت (والد وغیرہ) کو کسی کے ذریعہ کوئی غائب سلام بھیجے علاوہ حضرت سید المرسلین محمد رسول اللہ صلی اللہ تعالیٰ علیہ وعلی آلہ واصحابہ وازواجہ واتباعہ اجمعین کے دیگر حضراتِ مرحومین کے حق میں ثابت نہیں ہے، پس جس قدر ہوسکے ایصالِ ثواب کا اہتمام کیا کریں اور حسب موقع والد مرحوم کی قبر پر مطابق سنت حاضری وزیارت کرلیا کریں۔ (۴) قضائے عمری والد صاحب مرحوم کی طرف سے پڑھنے سے فرض واجب نمازوں کی ادائیگی نہ ہوگی، البتہ فرض وواجب (وتر) روزانہ چھ نمازوں کو محسوب کرکے فدیہ اداء کردیں تو ان شاء اللہ امید ہے کہ والد صاحب مرحوم موٴاخذہ سے بری ہوجائیں گے، ایک نماز کا فدیہ برابر ایک صدقة الفطر گیہوں اُن کی قیمت ہے، نمازوں کا مجموعہ محسوب کرکے بقدر تمام نمازوں کے غرباء فقراء مستحقین زکاة کو گیہوں یا ان کی قیمت دیدیں۔ (۵) (الف) شروع میں جو نماز جنازہ سے متعلق آپ نے لکھا ہے اُس کا حکم یہ ہے کہ نمازِ جنازہ جو آپ نے پڑھائی وہ درست وصحیح ہوگئی۔ فالحمد للہ علی ذلک