عنوان: میں نے بہت سے عربی نشید سنے ہیں جس میں لفظ یا رسول اللہ /یا محمد مذکور ہیں

سوال: میں جانتاہوں کہ یا حرف ندا ہے،اور جب کوئی موجود ہو تبھی اس کے لیے استعمال کیا جاتاہے ، اس لیے ہم ہمیشہ یا اللہ کہتے ہیں ، کیوں کہ اللہ ہر جگہ ہے۔میں نے بہت سے عربی نشید سنے ہیں جس میں لفظ یا رسول اللہ /یا محمد مذکور ہیں ، جو لوگ پڑھتے ہیں میں نے ان سے پوچھا تو انہوں نے کہا ان کے دل میں ایسا کچھ نہیں ہوتاہے جیسا کہ دوسرے لوگ رسول کی موجودگی کے تعلق سے رکھتے ہیں، بس ہم یو نہی کہتے ہیں تو کیا یہ درست ہے یا نہیں؟

جواب نمبر: 6085301-Sep-2020 : تاریخ اشاعت

بسم الله الرحمن الرحيم

Fatwa ID: 650-650/Sd=11/1436-U ”یا رسول اللہ“ کہنا مطلقا ممنوع نہیں ہے، ”یا رسول اللہ“ اس عقیدے سے کہنا کہ حضور صلی اللہ علیہ وسلم اللہ تعالیٰ کی طرح ہرجگہ حاضر وناظر ہیں، ہماری ہرپکار اور فریاد کو سننے والے ہیں، حاجت روا ہے؛ ناجائز ہے اور اشعار میں جو ”یا رسول اللہ“ یا ”یا محمد“ کے الفاظ آتے ہیں، وہ صرف تخیل کے طور پر شاعرانہ اور عاشقانہ خطاب ہوتا ہے، اشعار میں حاضر وناظر کا عقیدہ نہیں ہوتا، شعراء حاضر وناظر کے تصور کے بغیر غائب کے لیے لفظ ندا استعمال کرلیتے ہیں، لہٰذا حاضر وناظر کے عقیدے کے بغیر ایسے اشعار کا پڑھنا جن میں ”یا رسول اللہ“ یا ”یا محمد“ کے الفاظ آئے ہیں؛ فی نفسہ جائز ہے، البتہ اگر دوسروں کا عقیدہ بگڑنے کا اندیشہ ہو، تو نہ پڑھنے ہی میں احتیاط ہے۔ (فتاوی رحیمیہ: ۲/۱۰۸، کتاب السنة والبدعة، ط: دار الاشاعت، پاکستان)