عنوان: سوال میں مذكور  اشعار کا پڑھنا کیسا ہے ؟ 

سوال:

ان اشعار کا پڑھنا کیسا ہے ؟ مشہور نعتیہ کلام ہے ، مصطفیٰ جانِ رحمت پہ لاکھوں سلام۔ اس میں جو اشعار ہے انکو سہولت کے لئے نمبر لگا دیے گئے ہیں، جو اشعار مناسب نا ہو انکی نشان دہی کریں اور وجہ بھی براے ٴ کرم ساتھ ہی لکھ دیجیئے۔ دعاؤں کا طالب محمد زبیر شیخ پونا، مہاراشٹر ۱)مصطفی جانِ رحمت پہ لاکھوں سلام شمعِ بزمِ ہدایت پہ لاکھوں سلام ۲)مِہرِ چرخِ نبوت پہ روشن دُرود گلِ باغِ رسالت پہ لاکھوں سلام ۳)شہرِ یارِ ارم تاج دارِ حرم نوبہارِ شفاعت پہ لاکھوں سلام ۴)شبِ اسرا کے دولہا پہ دائم دُرود نوشئہ بزمِ جنّت پہ لاکھوں سلام ۵)عرش کی زیب و زینت پہ عرشی دُرود فرش کی طیب و نُزہت پہ لاکھوں سلام ۶)نورِ عینِ لطافت پہ اَلطف دُرود زیب و زینِ نظافت پہ لاکھوں سلام ۷)سروِ نازِ قِدَم مغزِ رازِ حِکَم یکّہ تازِ فضیلت پہ لاکھوں سلام ۸)نقطئہ سِرِّ وحدت پہ یکتا دُرود مرکزِ دورِ کثرت پہ لاکھوں سلام ۹)صاحبِ رَجعتِ شمس و شقُ القمر نائبِ دستِ قدرت پہ لاکھوں سلام ۰۱)جس کے زیرِ لِوا آدم و من سِوا اس سزائے سیادت پہ لاکھوں سلام ۱۱)عرش تا فرش ہے جس کے زیرِ نگیں اُس کی قاہر ریاست پہ لاکھوں سلام ۲۱)اصل ہر بُود و بہبود تُخمِ وجود قاسمِ کنزِ نعمت پہ لاکھوں سلام ۳۱)فتحِ بابِ نبوت پہ بے حد دُرود ختمِ دورِ رسالت پہ لاکھوں سلام ۴۱)شرقِ انوارِ قدرت پہ نوری دُرود فتقِ اَزہارِ قدرت پہ لاکھوں سلام ۵۱)بے سہیم و قسیم و عدیل و مثیل جوہرِ فردِ عزت پہ لاکھوں سلام ۶۱)سِرِّ غیبِ ہدایت پہ غیبی دُرود عطر جیبِ نہایت پہ لاکھوں سلام ۷۱)ماہِ لاہوتِ خَلوت پہ لاکھوں دُرود شاہِ ناسوتِ جَلوت پہ لاکھوں سلام ۸۱)کنزِ ہر بے کس و بے نوا پر دُرود حرزِ ہر رفتہ طاقت پہ لاکھوں سلام ۹۱)پرتوِ اسمِ ذاتِ اَحد پر دُرود نُسخئہ جامعیت پہ لاکھوں سلام ۰۲)مطلعِ ہر سعادت پہ اسعد دُرود مقطعِ ہر سیادت پہ لاکھوں سلام ۱۲)خلق کے داد رس سب کے فریاد رس کہفِ روزِ مصیبت پہ لاکھوں سلام ۲۲)مجھ سے بے کس کی دولت پہ لاکھوں دُرود مجھ سے بے بس کی قوت پہ لاکھوں سلام ۳۲)شمعِ بزمِ دنیٰ ہُوْ میں گم کُن اَنَا شرحِ متنِ ہُوِ یَّت پہ لاکھوں سلام ۴۲)انتہائے دوئی ابتدائے یکی جمع تفریق و کثرت پہ لاکھوں سلام ۵۲)کثرتِ بعدِ قلّت پہ اکثر دُرود عزتِ بعدِ ذلّت پہ لاکھوں سلام ۶۲)ربِّ اعلا کی نعمت پہ اعلا دُرود حق تعالیٰ کی منّت پہ لاکھوں سلام ۷۲)ہم غریبوں کے آقا پہ بے حد دُرود ہم فقیروں کی ثروت پہ لاکھوں سلام ۸۲)فرحتِ جانِ مومن پہ بے حد دُرود غیظِ قلبِ ضلالت پہ لاکھوں سلام ۹۲)سببِ ہر سبب منتہائے طلب علّتِ جملہ علّت پہ لاکھوں سلام ۰۳)مصدرِ مظہریت پہ اظہر دُرود مظہرِ مصدریت پہ لاکھوں سلام ۱۳)جس کے جلوے سے مرجھائی کلیا ں کھلیں اُس گلِ پاک مَنبت پہ لاکھوں سلام ۲۳)قدِّ بے سایہ کے سایئہ مرحمت ظلِ ممدود رافت پہ لاکھوں سلام ۳۳)طائرانِ قُدُس جس کی ہیں قُمریاں اُس سہی سرو قامت پہ لاکھوں سلام ۴۳)وصف جس کا ہے آئینئہ حق نما اُس خدا ساز طلعت پہ لاکھوں سلام ۵۳)جس کے آگے سرِ سروراں خم رہیں اُس سرِ تاجِ رفعت پہ لاکھوں سلام ۶۳)وہ کرم کی گھٹا گیسوے مُشک سا لکّئہ ابرِ رافت پہ لاکھوں سلام ۷۳)لَیْلَةُ القدر میں مطلعِ الفجر حق مانگ کی استقامت پہ لاکھوں سلام ۸۳)لخت لختِ دلِ ہر جگر چاک سے شانہ کرنے کی عادت پہ لاکھوں سلام ۹۳)دُور و نزدیک کے سُننے والے وہ کان کانِ لعلِ کرامت پہ لاکھوں سلام ۰۴)چشمئہ مِہر میں موجِ نورِ جلال اُس رگِ ہاشمیت پہ لاکھوں سلام ۱۴)جس کے ماتھے شفاعت کا سہرا رہا اُس جبینِ سعادت پہ لاکھوں سلام ۲۴)جن کے سجدے کو محرابِ کعبہ جھکی اُن بھووں کی لطافت پہ لاکھوں سلام ۳۴)اُن کی آنکھوں پہ وہ سایہ افگن مژہ ظلئہ قصرِ رحمت پہ لاکھوں سلام ۴۴)اشک باریِ مژگاں پہ برسے دُرود سلکِ دُرِّ شفاعت پہ لاکھوں سلام ۵۴)معنیِ قَدْ رَأیٰ مقصدِ مَاطَغیٰ نرگسِ باغِ قدرت پہ لاکھوں سلام ۶۴)جس طرف اٹھ گئی دم میں دم آ گیا اُس نگاہِ عنایت پہ لاکھوں سلام ۷۴)نیچی آنکھوں کی شرم و حیا پر دُرود اونچی بینی کی رفعت پہ لاکھوں سلام ۸۴)جن کے آگے چراغِ قمر جھلملائے اُن عِذاروں کی طلعت پہ لاکھوں سلام ۹۴)اُن کے خد کی سُہُولت پہ بے حد دُرود اُن کے قد کی رشاقت پہ لاکھوں سلام ۰۵)جس سے تاریک دل جگمگانے لگے اُس چمک والی رنگت پہ لاکھوں سلام ۱۵)چاند سے منہ پہ تاباں درخشاں دُرود نمک آگیں صباحت پہ لاکھوں سلام ۲۵)شبنمِ باغِ حق یعنی رُخ کا عَرَق اُس کی سچی بَراقت پہ لاکھوں سلام ۳۵)خط کی گردِ دہن وہ دل آرا پھبن سبزئہ نہرِ رحمت پہ لاکھوں سلام ۴۵)رِیشِ خوش معتدل مرہمِ رَیش دل ہالئہ ماہِ نُدرت پہ لاکھوں سلام ۵۵)پتلی پتلی گلِ قُدس کی پتّیاں اُن لبوں کی نزاکت پہ لاکھوں سلام ۶۵)وہ دہن جس کی ہر بات وحیِ خدا چشمئہ علم و حکمت پہ لاکھوں سلام ۷۵)جس کے پانی سے شاداب جان و جناں اُس دہن کی طراوت پہ لاکھوں سلام ۸۵)جس سے کھاری کنویں شیرئہ جاں بنے اُس زُلالِ حلاوت پہ لاکھوں سلام ۹۵)وہ زباں جس کو سب کُن کی کنجی کہیں اُس کی نافذ حکومت پہ لاکھوں سلام ۰۶)اُس کی پیاری فصاحت پہ بے حد دُرود اُس کی دل کش بلاغت پہ لاکھوں سلام ۱۶)اُس کی باتوں کی لذّت پہ بے حد دُرود اُس کے خطبے کی ہیبت پہ لاکھوں سلام ۲۶)وہ دُعا جس کا جوبن قبولِ بہار اُس نسیمِ اجابت پہ لاکھوں سلام ۳۶)جن کے گچھّے سے لچھّے جھڑیں نور کے اُن ستاروں کی نُزہت پہ لاکھوں سلام ۴۶)جس کی تسکیں سے روتے ہوئے ہنس پڑیں اُس تبسم کی عادت پہ لاکھوں سلام ۵۶)جس میں نہریں ہیں شیر شکر کی رواں اُس گلے کی نضارت پہ لاکھوں سلام ۶۶)دوش بردوش ہے جن سے شانِ شَرَف ایسے شانوں کی شوکت پہ لاکھوں سلام ۷۶)حَجَرِ اسودِ کعبئہ جان و دل یعنی مُہرِ نبوت پہ لاکھوں سلام ۸۶)روئے آئینئہ علم پُشتِ حضور پُشتیِ قصرِ ملّت پہ لاکھوں سلام ۹۶)ہاتھ جس سمت اُٹھّا غنی کر دیا موجِ بحرِ سماحت پہ لاکھوں سلام ۰۷)جس کو بارِ دو عالم کی پروا نہیں ایسے بازو کی قوّت پہ لاکھوں سلام ۱۷)کعبئہ دین و ایماں کے دونوں ستوں ساعدینِ رسالت پہ لاکھوں سلام ۲۷)جس کے ہر خط میں ہے موجِ نورِ کرم اُس کفِ بحرِ ہمّت پہ لاکھوں سلام ۳۷)نُور کے چشمے لہرائیں دریا بہیں انگلیوں کی کرامت پہ لاکھوں سلام ۴۷)عیدِ مشکل کُشائی کے چمکے ہِلال ناخنوں کی بشارت پہ لاکھوں سلام ۵۷)رفعِ ذکرِ جلالت پہ اَرفع دُرود شرحِ صدرِ صدارت پہ لاکھوں سلام ۶۷)دل سمجھ سے ورا ہے مگر یوں کہوں غنچئہ رازِ وحدت پہ لاکھوں سلام ۷۷)کُل جہاں مِلک اور جَو کی روٹی غذا اُس شکم کی قناعت پہ لاکھوں سلام ۸۷)جو کہ عزمِ شفاعت پہ کھنچ کر بندھی اُس کمر کی حمایت پہ لاکھوں سلام ۹۷)انبیا تَہ کریں زانُو اُن کے حضور زانُوؤں کی وجاہت پہ لاکھوں سلام ۰۸)ساق اصلِ قدم شاخِ نخلِ کرم شمعِ راہِ اِصابت پہ لاکھوں سلام ۱۸)کھائی قرآں نے خاکِ گزر کی قسم اُس کفِ پا کی حُرمت پہ لاکھوں سلام ۲۸)جس سہانی گھڑی چمکا طیبہ کا چاند اُس دل افروز ساعت پہ لاکھوں سلام ۳۸)پہلے سجدے پہ روزِ ازل سے دُرود یادگاریِ اُمّت پہ لاکھوں سلام ۴۸)زرع شاداب و ہر ضرع پُر شیر سے برَکاتِ رضاعت پہ لاکھوں سلام ۵۸)بھائیوں کے لیے ترکِ پِستاں کریں دودھ پیتوں کی نِصفَت پہ لاکھوں سلام ۶۸)مہدِ والا کی قسمت پہ صدہا دُرود بُرجِ ماہِ رسالت پہ لاکھوں سلام ۷۸)اللہ اللہ وہ بچپنے کی پھبَن! اُس خدا بھاتی صورت پہ لاکھوں سلام ۸۸)اُٹھتے بوٹوں کی نشوونَما پر دُرود کھِلتے غنچوں کی نکہت پہ لاکھوں سلام ۹۸)فضلِ پیدایشی پر ہمیشہ دُرود کھیلنے سے کراہت پہ لاکھوں سلام ۰۹)اعتلائے جبلّت پہ عالی دُرود اعتدالِ طَوِیّت پہ لاکھوں سلام ۱۹)بے بناوٹ ادا پر ہزاروں دُرود بے تکلف ملاحت پہ لاکھوں سلام ۲۹)بھینی بھینی مہک پر مہکتی دُرود پیاری پیاری نفاست پہ لاکھوں سلام ۳۹)میٹھی میٹھی عبارت پہ شیریں دُرود اچھی اچھی اِشارت پہ لاکھوں سلام ۴۹)سیدھی سیدھی رَوِش پر کروروں دُرود سادی سادی طبیعَت پہ لاکھوں سلام ۵۹)روزِ گرم و شبِ تیرہ و تار میں کوہ و صحرا کی خَلوت پہ لاکھوں سلام ۶۹)جس کے گھیرے میں ہیں انبیا و مَلک اس جہاں گیر بعثت پہ لاکھوں سلام ۷۹)ادھے شیشے جھلاجھل دمکنے لگے جلوہ ریزیِ دعوت پہ لاکھوں سلام ۸۹)لطفِ بیداریِ شب پہ بے حد دُرود عالمِ خوابِ راحت پہ لاکھوں سلام ۹۹)خندئہ صبحِ عشرت پہ نُوری دُرود گِریئہ ابرِ رحمت پہ لاکھوں سلام ۰۰۱)نرمیِ خوئے لینت پہ دائم دُرود گرمیِ شانِ سطوت پہ لاکھوں سلام ۱۰۱)جس کے آگے کھنچی گردنیں جھک گئیں اُس خداداد شوکت پہ لاکھوں سلام ۲۰۱)کس کو دیکھا یہ موسیٰ سے پوچھے کوئی آنکھوں والوں کی ہمّت پہ لاکھوں سلام ۳۰۱)گردِ مہ دستِ انجم میں رَخشاں ہِلال بدر کی دفعِ ظلمت پہ لاکھوں سلام ۴۰۱)شورِ تکبیر سے تھرتھراتی زمیں جنبشِ جیشِ نصرت پہ لاکھوں سلام ۵۰۱)نعرہائے دلیراں سے بَن گونجتے غُرّشِ کوسِ جرأت پہ لاکھوں سلام ۶۰۱)وہ چقاچاق خنجر سے آتی صدا مصطفی تیری صَولت پہ لاکھوں سلام ۷۰۱)اُن کے آگے وہ حمزہ کی جاں بازیاں شیرِ غُرّانِ سطوت پہ لاکھوں سلام ۸۰۱)الغرض اُن کے ہر مو پہ لاکھوں دُرود اُن کی ہر خُو و خصلت پہ لاکھوں سلام ۹۰۱)اُن کے ہر نام و نسبت پہ نامی دُرود اُن کے ہر وقت و حالت پہ لاکھوں سلام ۰۱۱)اُن کے مولا کی اُن پر کروروں دُرود اُن کے اصحاب و عترت پہ لاکھوں سلام ۱۱۱)پارہائے صُحف غنچہ ہائے قُدُس اہلِ بیتِ نبوت پہ لاکھوں سلام ۲۱۱)آبِ تطہیر سے جس میں پودے جمے اُس ریاضِ نجابت پہ لاکھوں سلام ۳۱۱)خونِ خیرُالرُّسل سے ہے جن کا خمیر اُن کی بے لوث طینت پہ لاکھوں سلام ۴۱۱)اُس بتولِ جگر پارئہ مصطفی حجلہ آرائے عِفّت پہ لاکھوں سلام ۵۱۱)جس کا آنچل نہ دیکھا مہ و مِہر نے اُس رِدائے نَزاہت پہ لاکھوں سلام ۶۱۱)سیّدہ زاہرہ طیّبہ طاہرہ جانِ احمد کی راحت پہ لاکھوں سلام ۷۱۱)حَسَنِ مجتبیٰ سیّدُ الاسخیا راکبِ دوشِ عزت پہ لاکھوں سلام ۸۱۱)اَوجِ مِہرِ ہُدیٰ موجِ بحرِ نَدیٰ رَوحِ رُوحِ سخاوت پہ لاکھوں سلام ۹۱۱)شہد خوارِ لُعابِ زبانِ نبی چاشنی گیرِ عصمت پہ لاکھوں سلام ۰۲۱)اُس شہیدِ بَلا شاہِ گلگوں قَبا بے کسِ دشتِ غربت پہ لاکھوں سلام ۱۲۱)دُرِّ دُرجِ نجف مِہرِ بُرجِ شَرَف رنگِ رومی شہادت پہ لاکھوں سلام ۲۲۱)اہلِ اسلام کی مادرانِ شفیق بانوانِ طہارت پہ لاکھوں سلام ۳۲۱)جلوگیّانِ بیتُ الشَّرَف پر دُرود پردگیّانِ عفّت پہ لاکھوں سلام ۴۲۱)سَیِّما پہلی ماں کہفِ امن و اماں حق گزارِ رفاقت پہ لاکھوں سلام ۵۲۱)عرش سے جس پہ تسلیم نازل ہوئی اُس سرائے سلامت پہ لاکھوں سلام ۶۲۱)منزلُُ مَّن قَصَبْ لَا نَصَبْ لَاصَخَبْ ایسے کوشک کی زینت پہ لاکھوں سلام ۷۲۱)بنتِ صدّیق آرامِ جانِ نبی اُس حریمِ براء ت پہ لاکھوں سلام ۸۲۱)یعنی ہے سورئہ نور جن کی گواہ اُن کی پُر نور صورت پہ لاکھوں سلام ۹۲۱)جن میں رُوح ا لقدُس بے اجازت نہ جائیں اُن سُرادِق کی عِصمت پہ لاکھوں سلام ۰۳۱)شمعِ تابانِ کاشانئہ اجتہاد مفتیِ چار ملّت پہ لاکھوں سلام ۱۳۱)جاں نثارانِ بدر و اُحُد پر دُرود حق گزارانِ بیعَت پہ لاکھوں سلام ۲۳۱)وہ دسوں جن کو جنت کا مژدہ ملا اُس مبارک جماعت پہ لاکھوں سلام ۳۳۱)خاص اُس سابقِ سیرِ قُربِ خدا اوحَدِ کاملیَّت پہ لاکھوں سلام ۴۳۱)سایئہ مصطفیٰ مایئہ اِصطَفیٰ عِزّو نازِ خلافت پہ لاکھوں سلام ۵۳۱)یعنی اُس افضلُ الخلق بعدَ الرُّسُل ثانی اَثنَینِ ہجرت پہ لاکھوں سلام ۶۳۱)اصدقُ الصّادِقیں سیّدُ المتّقیں چشم و گوشِ وزارت پہ لاکھوں سلام ۷۳۱)وہ عمر جس کے اعدا پہ شیدا سقر اُس خدا دوست حضرت پہ لاکھوں سلام ۸۳۱)فارقِ حقّ و باطل امامِ الہُدیٰ تیغِ مسلول شدّت پہ لاکھوں سلام ۹۳۱)ترجمانِ نبی ہم زبانِ نبی جانِ شانِ عدالت پہ لاکھوں سلام ۰۴۱)زاہدِ مسجدِ احمدی پر دُرود دولتِ جیشِ عُسرت پہ لاکھوں سلام ۱۴۱)دُرِّ منثور قرآں کی سلک بہی زوجِ دو نور عفّت پہ لاکھوں سلام ۲۴۱)یعنی عثمان صاحب قمیصِ ہدیٰ حُلّہ پوشِ شہادت پہ لاکھوں سلام ۳۴۱)مرتضیٰ شیرِ حق اشجع الاشجعیں ساقی شیر و شربت پہ لاکھوں سلام ۴۴۱)اصل نسلِ صفا وجہِ وصلِ خدا بابِ فصلِ ولایت پہ لاکھوں سلام ۵۴۱)اّولیں دافعِ اہلِ رفض و خروج چارمی رکنِ ملّت پہ لاکھوں سلام ۶۴۱)شیرِ شمشیر زن شاہِ خیبر شکن پرتوِ دستِ قدرت پہ لاکھوں سلام ۷۴۱)ماحیِ رفض و تفضیل و نصب و خروج حامیِ دین و سنت پہ لاکھوں سلام ۸۴۱)مومنیں پیشِ فتح و پسِ فتح سب اہلِ خیر و عدالت پہ لاکھوں سلام ۹۴۱)جس مسلماں نے دیکھا اُنھیں اک نظر اُس نظر کی بصارت پہ لاکھوں سلام ۰۵۱)جن کے دشمن پہ لعنت ہے اللہ کی اُن سب اہلِ محبت پہ لاکھوں سلام ۱۵۱)باقیِ ساقیانِ شرابِ طہور زینِ اہلِ عبادت پہ لاکھوں سلام ۲۵۱)اور جتنے ہیں شہزادے اُس شاہ کے اُن سب اہلِ مکانت پہ لاکھوں سلام ۳۵۱)اُن کی بالا شرافت پہ اعلا دُردو اُن کی والا سیادت پہ لاکھوں سلام ۴۵۱)شافعی مالک احمد امامِ حنیف چار باغِ امامت پہ لاکھوں سلام ۵۵۱)کاملانِ طریقت پہ کامل دُرود حاملانِ شریعت پہ لاکھوں سلام ۶۵۱)غوثِ اعظم امامُ التقیٰ والنقیٰ جلوئہ شانِ قدرت پہ لاکھوں سلام ۷۵۱)قطبِ ابدال و ارشاد و رُشدالرشاد مُحییِ دین و ملّت پہ لاکھوں سلام ۸۵۱)مردِ خیلِ طریقت پہ بے حد دُرود فردِ اہلِ حقیقت پہ لاکھوں سلام ۹۵۱)جس کی منبر ہوئی گردنِ اولیا اُس قدم کی کرامت پہ لاکھوں سلام ۰۶۱)شاہِ برکات و برکات پیشینیاں نوبہارِ طریقت پہ لاکھوں سلام ۱۶۱)سید آلِ محمد امام الرشید گلِ روضِ ریاضت پہ لاکھوں سلام ۲۶۱)حضرتِ حمزہ شیرِ خدا و رسول زینتِ قادریت پہ لاکھوں سلام ۳۶۱)نام و کام و تن و جان و حال و مقال سب میں اچھے کی صورت پہ لاکھوں سلام ۴۶۱)نورِ جاں عطر مجموعہ آلِ رسول میرے آقائے نعمت پہ لاکھوں سلام ۵۶۱)زیبِ سجّادہ سجّاد نوری نہاد احمدِ نورِ طینت پہ لاکھوں سلام ۶۶۱)بے عذاب و عتاب و حساب و کتاب تاابد اہلِ سنّت پہ لاکھوں سلام ۷۶۱)تیرے ان دوستوں کے طفیل اے خدا بندئہ ننگِ خلقت پہ لاکھوں سلام ۸۶۱)میرے اُستاد ماں باپ بھائی بہن اہلِ وُلد و عشیرت پہ لاکھوں سلام ۹۶۱)ایک میرا ہی رحمت میں دعویٰ نہیں شاہ کی ساری اُمّت پہ لاکھوں سلام ۰۷۱)کاش محشر میں جب اُن کی آمد ہو اور بھیجیں سب اُن کی شوکت پہ لاکھوں سلام ۱۷۱)مجھ سے خدمت کے قُدسی کہیں ہاں ! رضا# مصطفی جانِ رحمت پہ لاکھوں سلام

جواب نمبر: 60466826-Jun-2021 : تاریخ اشاعت

بسم الله الرحمن الرحيم

Fatwa : 1249-317T/H=11/1442

 آپ (محمد زبیر شیخ پونا، مہاراشٹر) نے جو ایک سو اکتہر (171) اشعار نقل کئے ہیں یہ اشعار بانیٴ فرقہٴ بریلویہ مولوی احمد رضا خان بریلوی کی طرف منسوب ہیں، پس آپ (اور دیگر عامة المسلمین بھائیوں) کو اِن اشعار کا پڑھنا سننا جائز نہیں۔ اہل باطل کی کتابیں تحریریں اشعار وغیرہ سے اجتناب کرنا چاہئے، بسااوقات اُن میں مہلک جراثیم اِس انداز سے سمو دیئے جاتے ہیں کہ جن پر مطلع ہونا آسان نہیں ہوتا اور آہستہ آہستہ اُن کے اثرات مہلک صورت اختیار کرلیتے ہیں۔ سیدنا حضرت عمر فاروق رضی اللہ تعالی عنہ ایک مرتبہ یہود کے یہاں سے توریت کا کچھ حصہ لے آئے اور حضرت رسول اللہ صلی اللہ تعالی علیہ وسلم کی خدمت بابرکت میں حاضر ہوکر اُس کو پڑھنا شروع کیا جس پر حضرت نبی اکرم و فخر عالم صلی اللہ تعالی علیہ وسلم نے انتہائی غضبناک غصہ اور لب و لہجہ میں اُس کے پڑھنے سے روکا۔ یہ پورا واقعہ مشکاة شریف، جلد: 1/32، میں موجود ہے۔ آپ کے ارسال کردہ اشعار کے ایک ایک شعر پر نقد و تبصرہ کی حاجت نہیں۔ حاصل یہ کہ صرف معتبر و مستند علماءِ صالحین اہل تقویٰ حضرات کی معتبر کتابوں اور اشعار وغیرہ کو حرزِجان بنانا چاہئے اُسی میں مسلمانوں کے لئے عافیت دارین ہے اور یہی صراطِ مستقیم ہے۔ اللہ پاک تمام اہل اسلام کے ایمان و اعمال کی حفاظت فرمائے، ہر خیر سے نوازکر ہر شر سے محفوظ رکھے۔ آمین