عنوان: موبائل جس میں قرآن ہو

سوال: میں نے موبائل ایپس (Mobile Apps)سے قرآن اور اس کا ترجمہ ڈاؤن لوڈ کیا ہے ، میں روزانہ ترجمے کے ساتھ اس کو پڑھتاہوں اور سورتیں یاد کرتاہوں، مقصد سیکھنا ہے۔ اور آپ جانتے ہیں کہ موبائل کا استعمال کیسے کیاجاتاہے یعنی اسے بیت الخلاء میں لے جانا، سونے سے پہلے بستر پر پھینک دینا وغیرہ۔ غرض کہ میں بھی دوسرے لوگوں کی طرح موبائل استعمال کرتاہوں۔ سوال یہ ہے کہ موبائل میں قرآن رکھنا درست ہے جب کہ میں اسے بیت الخلاء لے جاتاہوں،وضو کے بغیر ہوتا ہوں، وغیرہ۔ لیکن اس سے صرف سیکھنا مقصد ہے ۔ اگر یہ غلط ہے تو سیکھنے کا مطلب کیا ہوگا جیسے کہ میں روزانہ تلاوت کرتاہوں ، سفر میں بھی تلاوت کرتاہوں۔میں قرآن کو سننے کے بجائے پڑھنا چاہتاہوں۔ انگریزی زبان میں سب سے اچھا ترجمہ کونسا ہے؟نیز یہ بھی بتائیں کہ روزنہ صبح ، شام کوکونسی سورت پڑھنی چاہئے ؟

جواب نمبر: 5928301-Sep-2020 : تاریخ اشاعت

بسم الله الرحمن الرحيم

Fatwa ID: 613-589/N=7/1436-U

(۱) اگر موبائل میں قرآن پاک اسکرین پر کھلا ہوا ہو تو بلا وضو اسکرین پر ہاتھ یا انگلی لگانا درست نہیں، البتہ اسکرین کے علاوہ نیچے کے حصہ میں اور کنارے کنارے ہاتھ لگاسکتے ہیں، درست ہے، اور اگر ادبًا احتیاط کرے اور بلاضو اس صورت میں نیچے کے حصہ میں اور کنارے کنارے بھی ہاتھ نہ لگائے تو یہ بہت بہتر ہے، اور اگر قرآن پاک اسکرین پر کھلا ہوا نہ ہو تو بلاوضو موبائل میں کہیں بھی ہاتھ لگاسکتے ہیں، درست ہے۔ اور جس موبائل میں قرآن پاک ہو اس کے ساتھ ہے اکرامی کا معاملہ نہ کیا جائے، مثلاً بستر وغیرہ پر نہ پھینکے، اور اگر ممکن ہو تو پینٹ میں سرین یا ران والی جیب میں نہ رکھے، اسی طرح اگرکوئی مجبوری نہ ہو تو بیت ا لخلاء میں بھی لے کر نہ جائے، اور اگر آدمی کہیں سفر وغیرہ میں ہو اور موبائل باہر چھوڑکر بیت الخلاء جانا مناسب نہ ہو تو اس صورت میں موبائل حفاظت کی غرض سے بیت ا لخلاء میں ساتھ لیجانے میں کچھ حرج نہ ہوگا۔ (۲) معارف القرآن انگریزی میں آگئی ہے؛ لہٰذا اس کا مطالعہ کیا جائے۔ (۳) فجر کے بعد سورہٴ یٰسٓ، مغرب کے بعد سورہٴ واقعہ اور عشاء کے بعد سورہٴ ملک اور سورہٴ الم سجدہ پڑھنا چاہیے، احادیث میں اس کی فضیلت آئی ہے، اسی طرح فجر اور مغرب کے بعد اور سوتے وقت تین بار آیت الکرسی اور تین تین بار تینوں قل: سورہٴ اخلاص، سورہٴ فلق اور سورہٴ ناس پڑھ کر ہاتھوں پر تھتھکارکر سارے بدن پر پھیرلینا چاہیے۔