عنوان: بجز کفر وشرک کے کوئی گناہ خلود فی النار کا سبب نہیں ہے

سوال: حضرت میرا عقیدہ ہے کہ مسلمان اپنے گناہوں کی سزا کاٹ کر ایک نہ ایک دن جنّت ما ضرور جائے گا۔ قرآن میں ہے کہ قتل کی سزا ہمیشہ ہمیشہ کی جہنّم ہے تو کیا جو مسلمان قتل کرے وہ جنّت میں جائے گااگر جائے گا تو اس آیت کی تفسیر بتا دیں جس میں کہ قتل کی سزا ہمیشہ کی جہنّم ہے؟

جواب نمبر: 3786601-Sep-2020 : تاریخ اشاعت

بسم الله الرحمن الرحيم

فتوی: 712-173/5/1433 آپ کا عقیدہ ٹھیک ہے، تمام علماء متفق ہیں کہ بجز کفر وشرک کے کوئی گناہ خلود فی النار کا سبب نہیں ہے، اس پر قرآن وحدیث کے بے شمار دلائل موجود ہیں اور قصداً کسی مسلمان کو قتل کرنے کی قرآن میں جو سزا بیان کی گئی ہے یعنی ”ہمیشہ ہمیشہ جہنم میں رہنا“ اس کے بارے میں مفسرین فرماتے ہیں کہ یہ بطور زجر وتوبیخ کے ہے، یعنی قتل کرنا اتنا بڑا جرم ہے کہ اس کا حق یہ تھا کہ قاتل کی توبہ قبول نہ کی جاتی اور وہ ہمیشہ جہنم میں رہتا مگر بفضلِ خداوندی ایمان کی برکت سے اسے نجات ہوجائے گی، اس کے علاوہ اس سزا کے سلسلے میں اور بھی مفاہیم ومعانی بیان کیے گئے ہیں، أجاب بعض المحققین بأن ذلک خارج مخرج التغلیظ في الزجر إلخ (روح المعاني: ۳/۱۱۶، ط: إمدادیہ ملتان)