عنوان: عید میلاد النبی

سوال: (۱) آج کل حضرت ابوبکر رضی اللہ عنہ کی یوم ولادت کے موقع پر دیوبندی حضرات بریلویوں کی طرح جس طرح بریلوی عید میلادالنبی صلی اللہ علیہ وسلم مناتے ہیں اسی طرح ایک دن مناتے ہیں ، کیایہ جائزہے؟بریلوی حضرات کو اس پر اعتراض ہے، وہ کہتے ہیں کہ جب عید میلاد النبی مناتے ہیں تو دیوبندی حضرات غلط کہتے ہیں اور خود حضرت ابو بکر کا دن مناتے ہیں ؟ (۲) کیا اللہ تعالی نے یہ وعدہ فرمایا ہے کہ میں اس شخص کو معاف نہیں کروں گا جو شرک کرے گا۔ اگر یہ ہے تو برائے مہربانی مجھے وہ آیت یا حدیث قدسی بتائیں۔ (۳) کیا ابو سفیان ایمان لائے تھے؟اور کیا آپ صلی اللہ علیہ وسلم کے چچا ابو طالب ایمان لائے تھے؟کچھ کہتے ہیں ایمان لائے تھے اور کچھ منع کرتے ہیں۔ براہ کرم، کسی حدیث کا حوالہ دے کر سمجھائیں۔

جواب نمبر: 3560701-Sep-2020 : تاریخ اشاعت

بسم الله الرحمن الرحيم

فتوی(ب): 1997=393-12/1432 (۱) یوم میلاد ابوبکر منانے کی بابت تو ہم نے کبھی دیوبندیوں میں عید میلاد ابوبکر مناتے ہوئے نہ دیکھا ہے نہ سنا ہے۔ ہاں اتنی بات بعض مدارس میں دیکھی ہے کہ وہ یوم ولادت ابوبکر کے موقع پر ایک دن کی چھٹی کرتے ہیں وہ بھی محض اس لیے کہ طلبہ کو خلیفہٴ اول حضرت ابوبکر رضی اللہ عنہ کی تاریخ ولادت یاد کرانے کی غرض سے، اور کوئی رسم یا خرافات نہیں ہوتی ہے، اس لیے بریلویوں کا اعتراض صحیح نہیں ہے۔ (۲) جی ہاں اللہ تعالیٰ نے قرآن پاک میں ارشاد فرمایا ہے: ”اِنَّ اللّٰہَ لَا یَغْفِرُ اَنْ یُشْرَکَ بِہِ وَیَغْفِرُ مَا دُوْنَ ذٰلِکَ لِمَنْ یَشَآءُ“ (القرآن) (۳) جی ہاں، فتح مکہ کے دن حضرت سفیان رضی اللہ عنہ ایمان لے ےئے تھے اور انھوں نے اپنے بیٹے حضرت معاویہ رضی اللہ عنہ کو کاتبِ وحی رکھنے کی درخواست کی تھی، چنانچہ حضور صلی اللہ علیہ وسلم نے منظور فرمالی تھی اور ان کی صاحبزادی حضرت ام حبیبہ کا نکاح بھی آپ صلی اللہ علیہ وسلم کے ساتھ ہوا تھا۔ حضرت ابوطالب ایمان نہیں لائے تھے۔