عنوان: فرض اور واجب کے درمیان فرق؟

سوال: اسلام کے اندر کتنے مطلق فرائض ہیں؟ فرض اور واجب کے درمیان کیا فرق ہے ؟ان کی تعریف کیا ہے ؟ کتنے امام واجب کی اصطلاح کو نہیں مانتے؟ واجب کے اصطلاح کی ضرورت کیوں پیش آئی؟

جواب نمبر: 14851001-Sep-2020 : تاریخ اشاعت

بسم الله الرحمن الرحيم

Fatwa ID: 549-549/Sn=5/1438

(۱) ارکانِ اسلام پانچ ہیں: کلمہ، نماز، روزہ، حج، زکات، پھر ہرہر رکن سے متعلق بہت سے فرائض اور شروط ہیں جو کتبِ فقہ کے متعلقہ ابواب میں موجود ہیں، وہاں ملاحظہ کرسکتے ہیں۔

(۲) عملاً دونوں کے درمیان کوئی فرق نہیں ہے؛ البتہ اعتقاد کے اعتبار سے فرق ہے وہ یہ کہ ایک (فرض) کا انکار کفر ہے دوسرے (واجب) کا فسق وضلالت۔

(۳) جو قطعی الثبوت والدلالت نص سے ثابت ہو وہ فرض ہے جو قطعی الثبوت ظنی الدلالة یا ظنی الثبوت قطعی الدلالة نص سے ثابت ہو وہ واجب ہے۔ (شامی : ۱/۹۵، بیروت)

(۴) ائمہٴ احناف ”واجب“ کی اصطلاح کو مانتے ہیں؛ باقی ائمہ کے بارے میں ان کے مسلک کے علماء سے معلوم کریں۔

(۵) احکامِ شرعیہ اور ثبوت ودلالت کے اعتبار سے نصوص کی نوعیت کے پیش نظر ائمہ احناف نے ”واجب“ کی اصلاح مقرر کی ہے۔