عنوان: کیا بہنوں کو جہیز میں دیا گیا سامان مثلاً گاڑی اور رقم بھی وراثت میں شامل ہو سکتی ہے یا نہیں؟

سوال: (۱) ہم پانچ بھائی اور دو بہنیں ہیں، وراثت کی تقسیم کس طرح ہوگی؟ (۲) جائیداد میں کون کون سی اشیاء شامل کی جاتی ہیں؟ (۳) کیا بہنوں کو جہیز میں دیا گیا سامان مثلاً گاڑی اور رقم بھی وراثت میں شامل ہو سکتی ہے یا نہیں؟

جواب نمبر: 15244001-Sep-2020 : تاریخ اشاعت

بسم الله الرحمن الرحيم

Fatwa: 980-824/D=10/1438

(۱،۲) مرحوم نے جو چیزیں بھی اپنی ملکیت میں چھوڑی ہیں خواہ زمین، مکان، دکان، جائیداد ہو یا سونا، چاندی دیگر سامان اور اثاث البیت ہو سب ان کا ترکہ بن گیا اور سب میں وراثت جاری ہوگی، پہلے مرحوم کی تجہیز وتکفین کا خرچ پورا کیا جائے پھر ان کے ذمہ اگر قرض ہو تو اسے ادا کیا جائے اس کے بعد جو بچے اس کے ایک تہائی میں سے وصیت پوری کی جائے (اگر مرحوم نے وصیت کی ہو)

مرحوم کے والدین اور بیوی پہلے فوت ہوچکے ہوں اور ورثا میں صرف پانچ لڑکے دو لڑکیاں ہوں تو ترکہ کے بارہ (۱۲) حصے ہوکر دو دو حصے ہرلڑکے کو اور ایک ایک حصہ ہرلڑکی کو ملے گا۔

لڑکا                    =                                                    ۲

لڑکا                    =                                                    ۲

لڑکا                    =                                                    ۲

لڑکا                    =                                                    ۲

لڑکا                    =                                                    ۲

لڑکی                   =                                                    ۱

لڑکی                   =                                                    ۱

اگر مرحوم نے والدین یا بیوی میں سے کسی کو اپنے مرنے کے وقت باحیات چھوڑا ہو تو پھر تقسیم مذکور کو کالعدم سمجھیں اور مرحوم کے انتقال کے وقت ورثا میں جو لوگ زندہ رہے ہوں ان کی وضاحت کریں (لڑکے، لڑکی، ماں، باپ، بیوی)

(۳) نہیں، وفات کے وقت مرحوم کی ملکیت میں جو چیزیں تھی وہی ترکہ بنیں گی انھیں میں وراثت کی تقسیم ہوگی۔ لڑکیوں کو جہیز میں جو چیزیں دی جاچکیں وہ ان کی ہوچکی۔