عنوان: ۲۰/ رکعات تراویح کونسی حدیث میں ہے؟

سوال: حضرت، ۲۰/ رکعات تراویح کے سلسلے میں جو بھی حدیث آئی ہے وہ ضعیف ہے، مگر یہ بات آتی ہے کہ حضرت عمر ابن خطاب (رضی اللہ عنہ) نے ۲۰/ رکعات تراویح کا حکم دیا ہے اور خلفائے راشدین کا اجماع ہے اور تمام اللہ کے نیک بندوں کا اجماع ہے اس بات پر۔ حضرت، میں اس بات کی دلیل چاہتا ہوں کہ حضرت عمر (رضی اللہ عنہ) نے ۲۰/ رکعات تراویح پڑھائی ہے یہ کونسی حدیث میں ہے؟ مہربانی کرکے دلیل کے ساتھ بتائیں اور یہ بھی بتائیں کہ یہ حدیث صحیح ہے ضعیف؟

جواب نمبر: 16197801-Sep-2020 : تاریخ اشاعت

بسم الله الرحمن الرحيم

Fatwa:1239-1209/L=11/1439

بذاتِ خود حضرت عمر فاروق رضی اللہ عنہ کے تراویح پڑھانے کی صراحت تو ہم کو نہیں ملی تاہم حضرت عمر فاروق رضی اللہ عنہ نے ۲۰/ رکعات تراویح پڑھانے کا حکم صادر فرمایا تھا اور حضرت عمر رضی اللہ عنہ کے حکم یا ان کی رضامندی سے ۲۰/ رکعت کا ثبوت ایسا پختہ ہے کہ کسی منصف کو انکار کی گنجائش نہیں، واضح رہے کہ حضرت عمر رضی اللہ عنہ کے عہد میں ۲۰/ رکعات پر اجماع ہوگیا اور اجماع بھی حجج شرعیہ میں سے ایک مضبوط دلیل ہے۔ عن یزید بن رومان أنہ قال کان الناس یقومون في زمان عمر بن الخطاب في رمضان بثلاث وعشرین رکعة (موطا امام مالک: ۹۸) عن یحیی بن سعید أن عمر بن الخطاب أمر رجلا لیصلي بہم عشرین رکعة (مصنف ابن شیبہ: ج۲، ص: ۲۸۵)