عنوان: بار بار توبہ ٹوٹ جائے تو كیا كرنا چاہیے؟

سوال: ایک شخص بار بار گناہ کبیرہ کرتا ہے اور توبہ بھی کرتا ہے لیکن اپنے گنا ہ سے رک نہیں سکتا تو ایسے میں کیا کرنا چاہئے؟ قرآن او رحدیث کی روشنی میں بتائیں اور کوئی وظیفہ ہے استقامت کا تو وہ بھی بتادیں۔

جواب نمبر: 14560531-Aug-2020 : تاریخ اشاعت

بسم الله الرحمن الرحيم

Fatwa ID: 064-054/D=2/1438

گناہ کا صدور آدمی کے اختیار سے ہوتا ہے اور اختیاری چیز کے ترک کرنے میں آدمی کے ارادہ اور ہمت کا پورا دخل ہے پس ایسے موقعہ پر ارادہ کو مضبوط اور ہمت کو قوی رکھنے کی کوشش کی جائے نیز گناہ کے دنیوی و اخروی نقصانات اور سزا کو پیش نظر رکھا جائے، حضرت حکیم الامت مولانا اشرف علی تھانوی قدس سرہ کی تصنیف ”جزاء الاعمال“ کا مطالعہ کریں ان شاء اللہ فائدہ ہوگا۔

استغفار کی کثرت کریں، اور گناہ ہوجانے پر سچی توبہ کریں جس کا طریقہ یہ ہے کہ اولاً کئے ہوئے گناہ کو چھوڑ دیں پھر دل سے اس کے کرنے پر نادم اور شرمندہ ہوں اور آئندہ نہ کرنے کا عزم مصمم کریں اور دو رکعت صلوة توبہ پڑھ کر اللہ تعالیٰ سے رو رو کر معافی مانگیں۔